The Perceiver

Hawaon se tere gesuon ki mehak aa rahi hai,
Fizaon mein jaise kali muskura rahi hai,
Faqat khanjar uthana hi qatl-e-bayaan nahi hota,
Teri har ada mera khoon baha rahi hai…

Maana ke tere chahne waale hazaar honge,
Teri ek muskaan pe mitne ko taiyaar bhi honge,
Teri maujoodgi mein hosh kise rehta hoga bhala?
Behosh khade teri raah mein kayi dildaar honge…

Sab ne faqat aankhon ki hi tareef ki hogi,
Magar in ashqon ki chot na mehsoos ki hogi,
Jo lahoo bankar behte hain in palkon se,
Wo dard samajhne ki himmat kisi ne na ki hogi…

Ye ishq ek aag ka dariya hi lagta hai sabko,
Kahan phoolon ka mehal ye dikhta hai kisiko?
Hum teri mohabbat mein kuch is qadar doobe hain,
Na jalan ka hosh hai, na khushboo ki khabar humko…